एकैदिन लागू औषधसहित पाँच जना पक्राउ

अफजल खान
बर्दिया,असोज १
जिल्लाको विभिन्न ठाउँबाट लागू औषधसहित पाँच जनालाई प्रहरीले पक्राउ गरेको छ । लागू औषध ब्राउन सुगर जस्तो देखिने पदार्थसहित प्रहरीले मंगलबार पाँच जनालाई पक्राउ गरेको हो ।
बाँसगढी नगरपालिका–९ माछागढ दक्षिण टोलस्थितबाट सोही ठाउँका २९ वर्षीय अनिल विक र २३ वर्षीय रमेश शाहीलाई प्रहरीले लागू औषधसहित पक्राउ गरेको हो । प्रहरीका अनुसार उनीहरुको साथबाट २ ग्राम ९ सय ३० मिलिग्राम लागू औषध ब्राउन सुगर जस्तो देखिने पदार्थ र नगद रु १० हजार २ सय ७० फेला परेको छ । यस्तै गेरुवा गाउँपालिका–१ बिहानी बजारबाट सोही ठाउँका ३१ वर्षीय आशिक नेपालीलाई १ सय २० मिलिग्राम लागू औषध ब्राउन सुगरसहित प्रहरीले नियन्त्रणमा लिएको छ ।
मधुवन नगरपालिका–९ धर्मबस्ती बेलडाडी स्थितबाट सोही ठाउँका २३ वर्षीय अश्मित परियार र २५ वर्षीय मनिष कार्कीलाई १ सय ८५ मिलिग्राम लागू औषध ब्राउन सुगरसहित पक्राउ गरेको जनाईएको छ । पाँचै जनालाई नियन्त्रणमा लिई थप अनुसन्धान भईरहेको जिल्ला प्रहरी कार्यालय बर्दियाका सुचना अधिकारी एवंम् प्रहरी नायव उपरीक्षक रेशम बोहराले जानकारी दिनुभयो ।