नागरिकता लिन आउँदा जबरजस्ती करणीका फरार कसुरदार पक्राउ

अफजल खान
बर्दिया,असोज २
नयाँ नागरिकता लिन आउँदा जबरजस्ती करणीका फरार कसुरदार पक्राउ परेका छन् । नागरिकता लिन आउँदा फरार कसुरदारलाई जिल्ला प्रशासन कार्यालयले प्रहरीको सहयोगमा बिहीबार पक्राउ गरेको हो । पक्राउ पर्नेमा बढैयाताल गाउँपालिका–७ का २९ वर्षीय कृष्ण चमार रहेका छन् । विस २०७२ साल फागुन १० गते जिल्ला अदालतले जबरजस्ती करणी मुद्दामा चमारलाई १० वर्ष कैद सजाय र रु ५० हजार जरिवाना तोकेको थियो । फरार चमार बिहीबार नयाँ नागरिकता लिन जिल्ला प्रशासन कार्यालय बर्दिया पुगेका थिए । गोप्य सुचनाका आधारमा प्रशासनले प्रहरीको सहयोगमा चमारलाई नियन्त्रणमा लिएको हो । प्रहरी मार्फत चमारलाई अदालतमा पेश गरिएको र अदालतको आदेशले चमार बिहीबार नै कारागार चलान भएको जिल्ला प्रशासन कार्यालयका प्रशासकीय अधिकृत लोक प्रसाद ढकालले जानकारी दिनुभयो ।