आठ मस्जिदद्वारा संकलित रकम दैवी प्रकोप उद्धार कोषलाई हस्तान्तरण

अफजल खान
बर्दिया,भदौ १७
मस्जिद तथा मुस्लिम समाजबाट बाढी पीडितका लागि संकलित रकम प्रधानमन्त्री दैवी प्रकोप उद्धार कोषलाई हस्तान्तरण गरिएको छ । मस्जिद, मुस्लिम समाज एवंम् मोहम्मदपुर वेयलफेयर ट्रष्टको संयुक्त आयोजनामा मंगलबार आयोजित एक कार्यक्रम बिच संकलित रकम हस्तान्तरण गरिएको हो । मुस्लिम समुदायका अगुवा र मस्जिदका धर्म गुरुहरुको अगुवाईमा बाढी पीडितका लागि रकम संकलन गरिएको थियो । संकलित रकम प्रधानमन्त्री दैवी प्रकोप उद्धार कोषमा जम्मा गरी बैंक भौचर जिल्ला प्रशासनमार्फत सरकारलाई बुझाईएको छ । गुलरिया नगरपालिका वडा नंम्बर ११ र १२ स्थित रहेका ८ वटा मस्जिद र मुस्लिम समुदायबाट संकलित भएको रु २ लाख ५० हजार ५ सय ७२ जम्मा बैंक भौचर प्रमुख जिल्ला अधिकारी गोगन बहादुर हमाललाई हस्तान्तरण गरिएको गुलरिया नगरपालिका–११ मोहम्मदपुर वेयलफेयर ट्रष्टका अध्यक्ष सलमान खानले बताए । ‘विनासकारी बाढीले ठुलो धनजनको क्षति भएको छ,’उनले भने,‘यस विषम परिस्थितमा सकेको जति सहयोग गरेर सरकारलाई सघाँउन जरुरी छ ।’
रकम हस्तान्तरण कार्यक्रममा मुस्लिम समुदायका अगुवा, धर्मगुरु तथा समाजसेवीहरुको उपस्थिती रहेको थियो ।