बर्दिया,कार्तिक ०२
मोबाईल चोरी गरेको आरोपमा एक र विभिन्न मुद्दामा फरार रहेका तीन जनालाई प्रहरीले पक्राउ गरेको छ । प्रहरीले बिहीबार चार जनालाई पक्राउ गरेको हो । गत मंगलबार गुलरिया नगरपालिका–६ राधाकृष्ण चोक स्थित स्केट पार्कमा स्केट गर्न गएको बेला मोबाईल चोरी भएको गुलरिया नगरपालिका–२ का २१ वर्षिय प्रकाश सुनारले प्रहरीमा उजुरी दिएका थिए । प्रहरीले अनुसन्धानको क्रममा चोरी भएको मोबाईलसहित गुलरिया नगरपालिका–१ का २२ वर्षिय प्रदिप क्षेत्रीलाई पक्राउ गरेको छ ।
त्यसैगरि अंश मुद्दामा फरार रहेकी गुलरिया नगरपालिका–४ की कुमारी गोडिनलाई प्रहरीले पक्राउ गरेको छ । अदालतले गोडिनलाई २०७६ साल माघ १६ गते अंश मुद्दामा रु ३० हजार ८ सय १२ जरिवाना तोकेको थियो ।
अप्राकृतिक मैथुन मुद्दामा फरार रहेका दुई जनालाई प्रहरीले नियन्त्रणमा लिएको छ । बारबर्दिया नगरपालिका–६ का दुई जना बालकलाई प्रहरीले नियन्त्रणमा लिएको छ । अदालतले २०७९ साल जेठ ३ गते अप्राकृतिक मैथुन मुद्दामा दुवै जनालाई रु ३ लाख १२ हजार जरिवाना तोकेको थियो । अदालतले जरिवना तोकेदेखि दुवै जना फरार रहेका थिए । लुकिछिपी आफ्नै घरमा बसिरहेको अवस्थामा नियन्त्रणमा लिई आवश्यक कारवाहीको लागि अदालतमा उपस्थित गराएको जिल्ला प्रहरी कार्यालय गुलरियाका डिएसपी ऋषिराम घर्ती मगरले जानकारी दिए ।