२९ असार, कर्णाली । सुर्खेतमा पछिल्लो दुई महिनामा ७ किलो लागुऔषध बरामद भएको छ । लागुऔषधसहित ४४ जना पक्राउ परेका छन् ।
जिल्ला प्रहरी कार्यालय सुर्खेतले सामाजिक अपराधका घटना तथा गतिविधिलाई नियन्त्रण गर्न कडाइ गरेपछि लागुऔषध बरामदका घटना बढेको जिल्लाका प्रहरी प्रमुख प्रहरी उपरीक्षक सुधीरराज शाहीले बताए ।
‘यो दुई महिनाको अवधिमा हामीले करिब सात किलोग्राम लागुऔषध बरामद गर्नुका साथै ४४ जनालाई नियन्त्रणमा लिएर अनुसन्धान गर्दै आएका छौं,’ एसपी शाहीले बताए, ‘पक्राउ पर्नेमा पाँच महिला र ३९ पुरुष छन् ।’
उनका अनुसार दुई महिनाको अवधिमा ब्राउन सुगर ३५ ग्राम ३४० मिलीग्राम, चरेस १७ ग्राम ३६० मिलीग्राम, अफिम पाँच किलोग्राम ५४० ग्राम, गाँजा दुई सय ४० ग्राम र तीन सय ६२ वटा टयाब्लेट विभिन्न लागुऔषध बरामद गरिएको छ ।
अपराधका अन्य घटनामा पनि प्रहरीले कडाइ गरेको र यसक्रममा जुवातास खेल्ने २१ जना पक्राउ परेको एसपी शाहीले बताए । सामाजिक सदाचार तथा वेश्यावृत्ति कसुरमा तीन होटल सञ्चालक, १२ पुरुष, १२ महिला तथा एक जना एचआइभी सङ्क्रमित महिला पक्राउ परेको पनि उनले जानकारी दिए ।सभारअन्लाईनखबर
