चुनावको बेला मात्र सम्झिन्छन् नेताहरू, जनताको गुनासो बढ्दो

 अफजल खान /गुलरिया, बर्दिया —
प्रत्येक निर्वाचन नजिकिँदै गर्दा नेताहरू गाउँ–गाउँ डुल्न थाल्छन्, घरदैलो कार्यक्रम चलाउँछन्, विकासका मीठा सपना देखाउँछन्। तर चुनाव सकिएपछि भने न त तिनको अनुहार देखिन्छ, न त फोन उठाउँछन्। यस्तै गुनासो बढ्दै गएको छ बर्दियाका सर्वसाधारणबीच।

स्थानीय बासिन्दा रमेश चौधरी भन्छन्, “चुनाव आउनु केही महिना बाँकी रहँदा नेताहरूको भेटघाट बाक्लो हुन्छ, तर जितेपछि त गाउँमा फर्किएजस्तो पनि लाग्दैन।”

चुनावको समयमा पाइने आश्वासनहरू — सडक, खानेपानी, अस्पताल, रोजगारी जस्ता विषयमा — समय बितेपछि केवल सम्झनाका कुरा मात्र हुने गरेको गुनासो सर्वसाधारणले गरेका छन्।

विशेषगरी ग्रामीण क्षेत्रका मतदाताहरूले विकासका सन्दर्भमा नेताहरूको दायित्वबोधको कमीमाथि आक्रोश व्यक्त गरेका छन्। “हामीले विश्वास गरेर मत दिन्छौं, तर हामीलाई केवल मतदाता मात्र ठानिन्छ”, एक स्थानीय महिलाले बताइन्।

राजनीतिक विश्लेषकहरू भन्छन् — जबसम्म नागरिक स्वयं सचेत भइ नेताहरूलाई जवाफदेही बनाउन सक्दैनन्, तबसम्म यस्तो प्रवृत्ति अन्त्य हुँदैन।

बर्दिया मात्रै होइन, सिङ्गो देशमा चुनावको बेला जनता सम्झिने अनि पछि बेवास्ता गर्ने प्रवृत्ति मौलाउँदै गएको देखिन्छ।