सार्वजनिक बिदाको दिन बर्दिया प्रशासनले राष्ट्रिय परिचयपत्र सम्बन्धि सेवा प्रवाह गर्ने

बर्दिया,साउन ८
जिल्ला प्रशासन कार्यालयले सार्वजनिक बिदाको दिनमा राष्ट्रिय परिचयपत्र सेवा संचालन गर्ने भएको छ । जिल्ला प्रशासन कार्यालयले भोली शनिबार देखि सार्वजनिक बिदाको दिनमा समेत राष्ट्रिय परिचयपत्र सम्बन्धि सेवा दिने भएको हो ।
पछिल्लो समयमा राष्ट्रिय परिचयपत्र सम्बन्धि सेवा लिन आउने सेवाग्राहीहरुको संख्या दिनहुँ बढ्दै गएको छ । जिल्ला प्रशासनमा दिनहुँ १ सय ५० बढी सेवाग्राहीले राष्ट्रिय परिचयपत्र सम्बन्धि सेवा लिन आउने गरेका छन् ।
सेवाग्राहीको सुविधालाई मध्यनजर गरी सेवा प्रवाहलाई थप सहज, प्रभावकारी र व्यवस्थित बनाउन साउन ९ गतेदेखि शनिबार र आइतबार राष्ट्रिय परिचयपत्र सेवा संचालन गरिएको जिल्ला प्रशासन कार्यालयका प्रशासकीय अधिकृत लोक प्रसाद ढकालले बताउनु भयो ।
उहाँले भन्नुभयो,‘अर्को सुचना प्रकाशित नभएसम्म शनिबार र आइतबार बिहान ९ बजेदेखि बेलुका ५ बजेसम्म प्रशासन कार्यालयले राष्ट्रिय परिचयपत्र सम्बन्धि सेवा प्रवाह गर्नेछ ।’