बर्दिया जिल्लाको सदरमुकाम गुलरिया लगायतका बजारहरुमा चहलपहल बढेको छ । चाडपर्व सुरु भएसँगै बजारमा आवश्यक सर–सामाग्री किनमेल गर्नेको चहलपहल बढ्न थालेको हो । बजारमा मानिसको भिडभाड बढेपनि व्यापार भने खासै नभएको व्यवसायीको भनाई छ ।

विशेषगरी फेसनमा हिड्ने युवा पुस्ता जति सबै देश बाहिर गइरहेकाले त्यसको प्रत्यक्ष असर व्यवसायमा परिरहेको फेन्सी व्यवसायी अफ्ताब आन्सारिले बताउनुभयो । दसैं आउन अब केहिदिनमात्रै बाँकी रहदा बजार व्यस्त देखिएपनि व्यापार भने खासै नभएको उहाँले बताउनुभयो । अधिकांस व्यवसायीले यसपालीको तिजको अवसरमा खासै व्यापार नभएको बताएपनि केही व्यवसायीले भने विगतको तुलनामा यसपाली सन्तोषजनक व्यापार भएको बताएका छन् । विशेषगरी कस्मेटिकका सामाग्री किन्नेहरु बढेको कस्मेटिक व्यवसायी बताउनुभयो । कस्मेटिक सामानको व्यापार भने सन्तोषजनक रहेको उहाँको दाबी छ ।

विशेषगरी तिजमा महिलाहरुले फेन्सी र कस्मेटिक सम्बन्धिका सामानहरु बढि किनमेल गर्ने हुदा पनि कस्मेटिक सामानको व्यापार बढेको उहाँले बताउनुभयो । तिजमा महिलाहरुले सुनचादीका गरहना पनि किन्ने गरेपनि यसपाली भने सुनको भाउ आकासिदा सुनको व्यापार कम भएको पाइएको छ । ‘अहिले सुनको भाउ तोलाको १ लाख ५२ हजार रुपैयाँ पुगिसकेको छ, गुलरियाका सुनचादी व्यवसायी धिरजले भन्नुभयो, यसले गर्दा हामी सुनचादी व्यवसायी र सुन किन्ने ग्राहक दुबैलाई मर्का परेको छ ।, त्यसकारण पनि सुनचादीको व्यापार घट्दै गएको उहाँको भनाई छ ।

समग्रमा यसपालीको चाडपर्वमा विशेषगरी बजारमा कस्मेटिक र फेन्सी सम्बन्धिका सामाग्री बढि किनमेल भइरहेको छ भने सुनचादीको व्यापार फाट्टफुट्ट हुने गरेको छ । फेसनमा हिड्ने युवायुवती सबै बाहिर पलायन हुदा पनि व्यापार घटेको व्यवसायीहरु बताउछन् ।।