प्रतिष्ठानका सूचना अधिकारी निशानदाजु भट्टराईका अनुसार, भदौ १ देखि १७ गतेसम्म १ हजार २ सय ९९ जनाको परीक्षणमा २९ जनामा डेंगु पोजेटिभ देखिएको छ। भदौ १७ देखि २४ गतेसम्म थप १९ जनामा संक्रमण पुष्टि भएको छ। संक्रमितमध्ये अधिकांश घोराही क्षेत्रका छन्।
साउन १ देखि ३२ गतेसम्म १ हजार ४ सय ७६ जनाको परीक्षणमा २२ जनामा डेंगु पोजेटिभ देखिएको थियो। २०८० साउनदेखि २०८१ असारसम्म कुल ७६ जनामा डेंगु पुष्टि भएको छ।
डेंगु संक्रमण बढ्दै गएपछि ‘लामखुट्टेको लार्भा खोजौं र नष्ट गरौं’ अभियानलाई जिल्ला जनस्वास्थ्य कार्यालय दाङ र स्थानीय तह मातहतका स्वास्थ्य कार्यालयहरूले तीव्रता दिएका छन्। जिल्लाका सबै पालिकामा सरसफाइ र सचेतनामूलक कार्यक्रमहरू सञ्चालन गरिँदै आएको छ।
स्वास्थ्य संस्थाहरूले नागरिकलाई सतर्कता अपनाउन आग्रह गरेका छन्। लामो बाहुला भएका कपडा लगाउने, झुलको प्रयोग गर्ने, र पानी जम्न नदिनेजस्ता उपायहरू अपनाउन चिकित्सकहरूले सुझाव दिएका छन्। प्रतिष्ठानमा आउने बिरामीमध्ये अधिकांशलाई झाडापखाला, ज्वरो र डेंगु हुने गरेको जानकारी पनि दिइएको छ।साभारsitalpuronline
