स्वास्थ्य मन्त्रालय लुम्बिनी प्रदेशले क्यान्सर, मुटुको भल्भ फेर्न र मृगौला प्रत्यारोपण गर्नुपर्ने बिरामीलाई प्रदेश सरकारले दिने २ लाख सहयोग रकम सम्बन्धी जिल्लामै पाउने व्यवस्था गरेको छ । प्रदेश स्वास्थ्य मन्त्रालय धाउनु पर्ने बाध्यता हटाई स्वास्थ्य कार्यालयबाट जिल्लामै सेवा दिन थालिएको छ । लुम्बिनी प्रदेशका स्वास्थ्य मन्त्री खेम बहादुर सारूले प्रदेशभरीका सरकारी अस्पताल र प्रयोगशालाहरूमा रक्त परीक्षण, एक्सरे र भिडियो एक्सरे लगायतमा सेवामा लाग्ने शुल्कमा दरमा एकरुपता गर्ने लागिएको जानकारी दिए । बिस्तारै निजी स्वास्थ्य संस्थाले लिने परिक्षण शुल्कहरूमा पनि एउटै दररेट लागु गर्ने तयारी सरकारको रहेको मन्त्री सारुले बताए ।

मन्त्री सारुले मन्त्री भएको १०० दिन पूरा भएको अवसरमा १९ बुँदे कार्यप्रगति सार्वजनिक गर्दै स्वास्थ्य बिमालाई प्रोत्साहित गर्न प्रदेशका १३ अस्पताल, १२ स्वास्थ्य कार्यालय र १३ आयुर्वेद स्वास्थ्य संस्थाहरूमा कार्यरत २ हजार ६४ जना कर्मचारी र परिवारका सदस्यहरूको स्वास्थ्य बिमा गरिएको बताए ।

यस अवधिमा कोभिड १९ बाट मृत्यु भएका दाङका ५१ र पाल्पाको १५ परिवारलाई प्रति परिवार एक लाख सहयोग उपलब्ध गराइएको छ । सरकारी स्वास्थ्य संस्थामा कार्यरत चिकित्सक र स्वास्थ्यकर्मीहरुले नीजि क्लिनिक तथा अस्पतालमा सरकारी स्वास्थ्य संस्थाको नाम र पद राखेर विज्ञापन गरी र त्यहाँ बढी समय दिने कार्यलाई निरुसाहित गर्न सरकारी चिकित्सकको नाम राखेर विज्ञापन गर्न नपाउने व्यवस्थालाई कडाईका साथ लागु गरेको छ । बिरामीको अत्यधिक चाप हुने अस्पतालहरूमा डिजिटल प्रविधिबाट टिकट लिने, टोकन प्रणाली र बीमा काउन्टर सेवा सञ्चालन गरिएको छ । मातृ शिशु सम्बन्धी सुचकांक न्यून रहेका जिल्ला अर्घाखाँची, कपिलवस्तु र रूपन्देहीका अस्पतालहरूमा सेवा सुदृढिकरणको प्रयास गरिएको छ ।साभारबुटवल टुडे