ए.बि.पि न्युज नेपाल संवादाता

बर्दिया,कार्तिक २३
अटो अनियन्त्रित भई दुर्घटना हुँदा एक जनाको मृत्यु भएको छ ।बाँसगढी नगरपालिका–८ ककौराका ५९ वर्षिय दिर्घ नारायण पंगेनीको बिहीबार साँझ ६ बजे मृत्यु भएको हो । बाँसगढी नगरपालिका–४ मटेरिया चोक स्थित पुर्व पश्चिम राजमार्ग अन्तर्गत बिहीबार दिउँसो लक्ष्मणा देखि बाँसगढी तर्फ जाँदै गरेको भे १ च ४६८ नंम्बरको अटो अनियन्त्रित भई सडक देखि पाँच मिटर तल खसी दुर्घटना भएको प्रहरीले जनाएको छ ।

बाँसगढी नगरपालिका–६ का ५० वर्षिय चिल्ला थारुले मादक पदार्थ सेवन गरि सो अटो चलाएको प्रहरीको भनाई छ । दुर्घटना हुँदा अटोमा सवार दिर्घ नारायण पंगेनी र स्याङ्जाकी ७० वर्षिय यशोदा पंगेनी गम्भिर घाईते भएका थिए भने अन्य पाँच जना सामान्य घाईते भएका थिए । दुई गम्भिर घाईतेलाई थप उपचारको लागि मेडिकल कलेज कोहलपुर पु¥याईएको थियो ।

उपचारको क्रममा बिहीबार साँझ ६ बजे दिर्घ नारायण पंगेनीको मृत्यु भएको र सोही अस्पतालमा यशोदा पंगेनीको उपचार भईरहेको प्रहरीले जनाएको छ ।

प्रहरीका अनुसार सामान्य घाईते पाँच जना उपचारपछि डिस्चार्ज भएका छन् । अटो चालक थारुलाई प्रहरीले नियन्त्रणमा लिएको जिल्ला प्रहरी कार्यालय गुलरियाका डिएसपी ऋषिराम घर्ती मगरले जानकारी दिए ।