ए.बि.पि न्युज नेपाल संवादाता

राम प्रसाद चौहान
बर्दिया,मंसिर १४
गुलरिया टि–२० क्रिकेट प्रतियोगिता (बर्दिया कप २०८१)को फाइनल खेलमा आज बर्दिया क्रिकेट एकेडेमी ए र राजापुर नगरपालिका भिड्दै छन् । फाइनल खेल आज शुक्रबार बिहान ११ बजेदेखि सुरु हुने आयोजक जिल्ला क्रिकेट संघ बर्दियाले जनाएको छ ।

बिहीबार भएको लिग चरणको अन्तिम खेल जितेर राजापुर नगरपालिका फाइनल खेलमा प्रवेश गरेको हो । त्यसैगरि चार खेल जितेर बर्दिया क्रिकेट एकेडेमी (ए) फाइनलमा प्रवेश भएको थियो ।

यी दुई टिम बिच कसले बाजी मार्ने आजको फाइनल म्याचले देखाउनेछ । प्रथम हुने टिमलाई नगद रु ५० हजार र द्वतिय हुने टिमलाई २५ हजार ५ सय पुरस्कारको व्यवस्था रहेको जिल्ला क्रिकेट संघ बर्दियाका सदस्य सिद्धार्थ श्रेष्ठले जानकारी दिए ।
बिहीबार भएको लिग चरणको अन्तिम खेल राजापुर नगरपालिका र जनजागृति युवा क्लव मधुवन बिच भएको थियो । जनजागृतिलाई राजापुरले २८ रनले पराजित गरेको जनाईएको छ । यो जितसंग राजापुर फाइनलमा प्रवेश गरेको हो ।
टस जितेर पहिला ब्याटिङ्ग गरेको राजापुरले निर्धारित २० ओभरमा १ सय ३९ रन जोड्न सफल भएको थियो । राजापुरका लागि सर्वाधिक स्कोर सिदान्तराज शाहीले २८ बनाएका थिए भने संन्दिप नेपालीले १७ रनको योगदान गरेका थिए ।
जनजागृतितर्फ बिशाल खड्काले ३ बिकेट र ३० रन बनाउन सफल भएका थिए भने निखिल खत्री १७ रन बनाएका थिए । त्यसैगरि दिपक खड्काले २ बिकेट लिएका थिए । लिग चरणको अन्तिम खेलका म्यान अफ दि म्याच सिदान्तराज शाही घोषित भएका थिए ।
जिल्ला क्रिकेट संघ बर्दियाको आयोजनामा बर्दिया कप क्रिकेट प्रतियोगिता गत शनिबार देखि गुलरिया नगरपालिका–४ कवर्ड हल मैदानमा सुरु भएको थियो । प्रतियोगितामा पाँच टिमले सहभागिता जनाएका थिए ।