ए.टिभी न्युज नेपाल संवाददाता
बर्दिया,फागुन २

करिब सात घण्टाको अथक प्रयासपछि समस्याग्रस्त पोथी पाटे बाघ नियन्त्रणमा लिईएको छ । ठाकुरबाबा नगरपालिका अन्तर्गत अम्रेनी स्थितबाट बिहीबार बिहान ९ बजे समस्याग्रस्त पोथी पाटे बाघलाई डाँट गरि नियन्त्रणमा लिईएको हो ।

उक्त पोथी बाघले बस्तीमा पसेर खसी बाख्रा खाएर स्थानीयलाई दुःख दिईरहेको थियो । बस्तीतर्फ बाघ आएको राती १ बजे फोनमार्फत जानकारी आएको बर्दिया राष्ट्रिय निकुञ्जका रेन्जर सन्त बहादुर मगरले बताए ।

‘थप मानविय क्षति रोक्न समस्याग्रस्त बाघ नियन्त्रणमा लिएका छौं,’रेन्जर मगरले भने,‘नियन्त्रणमा लिईएको बच्चा पोथी पाटे बाघ हो ।’ बाघको स्वास्थ्य चेकजाँच भईरहेको छ । बाघलाई कहाँ लैजाने तत्काल भन्ने स्थिती छैन । नेपाली सेना, राष्ट्रिय प्रकृति संरक्षण कोष र बर्दिया राष्ट्रिय निकुञ्जको हात्तीसहितको संयुक्त टोलीले बाघ नियन्त्रण लिन सफल भएको छ ।

रम्मापुर वन्यजन्तु उद्दार केन्द्रमा ३ वटा र ठाकुरद्वारा निकुञ्जको मुख्यालयमा २ वटा गरि ५ वटा पाटे बाघ उद्दार केन्द्रमा रहेको रेन्जर मगरले जानकारी दिए ।