ए.टि.भि न्युज नेपाल संवाददाता
राम प्रसाद चौहान
बर्दिया,फागुन ८

गुलरिया नगरपालिका–८ सर्जुनदी टपरा स्थित नयाँ बस्तीबाट चितुवाले कुकुरको छाउरा ओसार्न सुरु गरेको छ । अघिल्लो साता देखि बस्ती वरिपरि देखिने चितुवाले घर आँगनबाट कुकुरका छाउरा ओसार्न सुरु गरेको हो ।

मंगलबार राति चितुवाले २ वटा कुकुरका छाउरा लगेको स्थानीय प्रत्यक्षदर्शीले बताएका छन् । राति साढे ११ बजे कुकुर र छाउरा जोड जोडले कराउन थालेपछि बाहिर निस्किएको स्थानीय उर्मिला गुप्ताले बताईन् । ‘टार्च बालेर हेर्दा कुकुर्नी डराएर एकातिर र छाउरा तितर बितर देखिए,’उनले भनिन्,‘अगाडि टार्च बालेर हेर्दा कुकुरको छाउरा मुखमा च्यापेर उखुबारीतिर भाग्दै गरेको चितुवा देखियो ।’ दुई पटकमा दुई वटा छाउरा उखुबारीतिर लगेको उनले सुनाईन् । ७ वटा छाउरा मध्य ५ वटा मात्र बचेको उनले जनाईन् ।

उक्त बस्ती नजिक ठुलो उखुबारी छ । त्यो उखुबारी भारतीय मुर्तिहा जंगल नजिकसम्म फैलिएको छ । मुर्तिहा जंगलबाट समसाँझै चितुवा निस्किएर उखुबारीतिर पस्ने गरेको सिमावर्ती किसानहरुले बताउँछन् । बस्ती वरपर देखिने चितुवा घर आँगनबाट कुकुरका छाउरा ओसार्न थालेपछि स्थानीय त्रसित बनेको स्थानीय अनुप कुमार गुप्ताले बताए । ‘छाउरा खाएर चितुवा बस्तीमा पल्कियो,’उनले भने,‘अब साना बालबच्चालाई जोगाउन मुस्किल भयो ।’