ए टिभी न्युज नेपाल

अफजल खान

बर्दिया असार ५ / इन्टरनेट युगमा मोबाइल फोन अब आवश्यक उपकरण बनेको छ। तर यही आवश्यकताले अहिले बर्दियालगायतका विभिन्न क्षेत्रका बालबालिकाको जीवनमा गम्भीर असर पार्न थालेको देखिएको छ।

बच्चाहरूको मोबाइलमा अत्यधिक समय बिताउने बानीले पढाइप्रति अरुचि, सामाजिक अलगाव, झर्कोपन र मानसिक असन्तुलनजस्ता समस्या देखिन थालेका छन्।

गुलरिया नगरपालिका–६ का एक अभिभावक भन्छन् –

> “बिहान उठ्नासाथ मोबाइल खोज्छ, गेम नखेलाए रिसाउँछ। पढ्न मन गर्दैन। हामी डराएका छौं कि उसले पढाइ नै छोड्ने हो कि भनेर।”

विद्यालयमा शिक्षकहरू समेत बालबालिकाको मोबाइल लतले पढाइमा असर गरेको स्वीकार्छन्। उनीहरूका अनुसार कक्षामा ध्यान दिनु, गृहकार्य गर्नु र सामूहिक गतिविधिमा सहभागी हुने प्रवृत्ति घट्दो छ।

बाल मनोविज्ञहरूको चेतावनी

> “मोबाइलको अत्यधिक प्रयोगले बालबालिकामा मानसिक तनाव, शारीरिक थकान र सामाजिक अलगाव बढाउने खतरा हुन्छ। यो नियन्त्रण नगरेमा दीर्घकालीन असर पर्छ।”

शिक्षक र अभिभावक दुवैले मिलेर बालबालिकालाई मोबाइलको प्रयोगमा सीमा तोक्न, नियमित निगरानी राख्न र वैकल्पिक रचनात्मक गतिविधिमा सहभागी गराउनुपर्ने विज्ञहरूको सुझाव छ।

अहिले नै कदम चालिएन भने भविष्यमा यो एक ठूलो सामाजिक संकट बन्न सक्ने देखिन्छ।