सामाजिक सञ्जालमा एआईद्वारा सिर्जित ‘यती’ ट्रेन्ड: सिर्जनशीलता कि विकृति

अफजल खान / गुलरिया, बर्दिया — पछिल्ला केही महिनादेखि सामाजिक सञ्जालमा ‘यती’ नामक पात्रले व्यापक चर्चा पाइरहेको छ। यो पात्र कुनै वास्तविक व्यक्तित्व नभई, कृत्रिम बुद्धिमत्ता (एआई) प्रविधिको माध्यमबाट सिर्जना गरिएको हो। तर, यसको रचनामा देखिएको छाडापन र द्विअर्थी प्रस्तुतिका कारण यसले सामाजिक चेतनामा नकारात्मक प्रभाव पार्न थालेको छ।

शुरुवातमा ‘यती’ ट्रेन्डलाई धेरैले हास्यव्यङ्ग्यको रूपमा लिए पनि, अहिले यसको स्वरूप विकृति र अश्लीलतासम्म पुग्न थालेको देखिन्छ। सामाजिक सञ्जाल प्रयोगकर्ताबीच यसको प्रयोग बढ्दै जाँदा, धेरैजसो पोस्टहरूमा यौनिकता, जातीय टिप्पणी, र व्यंग्यात्मक भाषा हाबी हुँदै गएको छ।

विशेष गरी किशोर र युवापुस्तामाझ ‘यती’ पात्रको क्रेज अत्यधिक देखिएको छ। केहीले यसलाई व्यक्तिगत अभिव्यक्तिको स्वतन्त्रता भनेका छन् भने, अरूले सामाजिक संरचनामाथिको प्रहारको रूपमा लिएका छन्। विद्यालय र कलेजस्तरका विद्यार्थीहरूबीच ‘यती’ नाम जोडेर बनाइने मिम र भिडियोहरू भाइरल भइरहेका छन्, जसमा कुनै सामाजिक सन्देश नभइ केवल उत्तेजना र मजाक मात्र पाइन्छ।