ताजिया जुलुसमा बालबालिका, युवा तथा वृद्धहरू सबैको सहभागीता थियो

अफजल खान/बर्दिया, असार २२ । मुस्लिम समुदायले प्रत्येक वर्ष विशेष श्रद्धा र भक्तिपूर्वक मनाउने मोहर्रम पर्व अन्तर्गत ताजिया जुलुस आज विशेष कार्यक्रमसहित सेलाएर सम्पन्न गरिएको छ। 

गुलरिया लगायत बर्दियाका विभिन्न स्थानहरूमा मुस्लिम समुदायका व्यक्तिहरूले ताजिया निकाल्दै हुसैनको सम्झनामा ताजिया जूलूस निकालेका थिए। ताजिया जुलुसमा बालबालिका, युवा तथा वृद्धहरू सबै सहभागी थिए।   

यो पर्व इस्लाम धर्मका प्रमुख पात्र हजरत इमाम हुसैनको बलिदान(सहादत) सम्झना स्वरूप मनाइन्छ। करबला मैदानमा सत्य, धर्म र न्यायको पक्षमा उभिएका इमाम हुसैन र उनका अनुयायीहरूको शहादतको सम्झनामा यो पर्व मनाइने गरिन्छ।

ताजिया कार्यक्रम शान्तिपूर्ण वातावरणमा सम्पन्न भएको र सुरक्षाको पूर्ण व्यवस्थापन गरिएको जिल्ला प्रशासन कार्यालय बर्दियाले जनाएको छ। स्थानीय तह, प्रहरी प्रशासन र स्वयंसेवकहरूको सक्रिय सहभागितामा जुलुस शान्तिपूर्वक सम्पन्न भएको हो।

मोहर्रमको अवसरमा शुभकामना आदानप्रदानसँगै मुस्लिम समुदायले आत्मशुद्धि र शान्तिको कामना गर्दै प्रार्थना पनि गरेका छन्।