आफजल खान

बर्दिया, असार  २९ / गुलरियामा मोटरसाइकल दुर्घटना हुँदा एक जनाको मृत्यु भएको छ । गुलरिया नगरपालिका–५ जिल्ला समन्वय समिति कार्यालय नजिक भित्री सडकखण्डमा मोटरसाइकल विद्युत पोलमा ठोक्किँदा मिहिपुरवाका एक जनाको आइतबार दिउँसो मृत्यु भएको हो ।

मोटरसाइकल दुर्घटनामा जिल्ला बहराइच ग्राम मिहिपुरवाका ६५ वर्षीय गुरमुख सिंहको मृत्यु भएको हो । सिंह ट्याक्टर बनाएर फर्किँदै गर्दा दुर्घटनामा परेको जनाइएको छ ।

सुहेलवादेखि राधाकृष्ण चोकतर्फ जाँदै गर्दा सिंहले चलाएको भारतीय नम्बरप्लेटको मोटरसाइकल बिजुलीको पोलमा ठोक्किएको थियो । घाइते सिंहलाई उपचारका लागि तत्काल बर्दिया अस्पताल पुर्‍याइएको थियो ।

उपचारका क्रममा आइतबार दिउँसो ३ बजेर १० मिनेटमा चिकित्सकले सिंहलाई मृत घोषणा गरेको जिल्ला प्रहरी कार्यालयका डीएसपी चक्र बहादुरडमरपालले जानकारी दिए । प्रहरीका अनुसार मृतक सिंह गुलरिया नगरपालिका–८ कोठिया स्थित पन्जाब डिजल वर्कसपमा कार्यरत थिए ।