बर्दिया, साउन १/ अदालतले एक वर्षमा १ हजार ७ सय १७ मुद्दा फर्स्योट गरेको छ । अदालतले आर्थिक वर्ष ०८१/०८२ मा १ हजार ७ सय १७ मुद्दा फर्स्योट गरेको हो। अदालतले लक्ष्य भन्दा बढी मुद्दा फर्स्योट गरेको छ।

आव ०८१/०८२ मा १ हजार ५ सय ३६ मुद्दा फर्स्योट गर्ने अदालतको वार्षिक लक्ष्य रहेको थियो । जसमा अदालतले वार्षिक लक्ष्यभन्दा १ सय ८१ बढी मुद्दा फर्स्योट गरेको छ ।

अघिल्लो आर्थिक वर्षका ८ सय ३ मुद्दा यस वर्षमा जिम्मेवारी सरेर आएको अदालतका स्रेस्तेदार कपिल पौडेलले बताए । ‘नयाँ १ हजार ४ सय ५० मुद्दा दर्ता हुँदा २ हजार २ सय ५३ वास्तविक लगत पुगेको थियो,’ उनले भने, ‘जसमा १ हजार ७ सय १७ मुद्दा फर्स्योट भएको छ भने ५ सय ३६ मुद्दा फर्स्योट हुन बाँकी छ ।’

देवानी मुद्दातर्फ यस वर्ष ४ सय १३ सम्बन्धविच्छेदका मुद्दामध्ये ३ सय ५६ मुद्दा फर्स्योट भएको छ भने ५७ मुद्दा फर्स्योट हुन बाँकी छ । फौजदारी मुद्दातर्फ १ सय ४८ लागू औषधका मुद्दामध्ये १ सय ३५ मुद्दा फर्स्योट भएको छ भने १३ मुद्दा फर्स्योट हुन बाँकी छ । त्यसैगरी ४९ वटा जबरजस्ती करणीका मुद्दामध्ये ३२ मुद्दा फर्स्योट भएको छ भने १७ मुद्दा फर्स्योट हुन बाँकी रहेको अदालतमा रेकर्ड सुरक्षित छ ।

विविध मुद्दाका कसुरदारहरूबाट २ हजार ४ सय १० वर्ष ९ महिना १० दिन कैद लगत असुल हुनुपर्नेमा अदालतले १ हजार २७ वर्ष १ महिना २३ दिन कैद असुल गरेको छ भने १ हजार ३ सय ८३ वर्ष ७ महिना २४ दिन कैद असुलउपर हुन बाँकी छ ।

जरिवानातर्फको लगत १५ करोड ४१ लाख २१ हजार ५ सय ७ रुपैयाँ असुल हुनुपर्नेमा २ करोड ८४ लाख ५३ हजार ४ सय ९६ रुपैयाँ असुलउपर भएको छ भने १२ करोड ५६ लाख ६८ हजार ११ रुपैयाँ जरिवाना असुल हुन बाँकी रहेको अदालतका तहसिलदार श्रीधर सुवेदीले बताए ।

अदालतको सिङ्गो टिमको अथक मिहिनेत र प्रयासले ७६ दशमलव २० प्रतिशत मुद्दा फर्स्योट सम्भव भएको न्यायाधीश मनोज श्रेष्ठले बताए ।

खुला सिमानाका कारण लागू औषध दुर्व्यसनी बढेको र बढी मुद्दा दर्ता भएको न्यायाधीश डल्लुराम चौधरीले बताए । लागू औषध न्यूनीकरणका लागि जनचेतनामूलक समाचार सम्प्रेषण गर्न न्यायाधीश चौधरीले आग्रहसमेत गरे ।