बर्दिया,साउन १४/ एक वर्षमा सिमा नाकाबाट लागू औषधसहित ५५ जनालाई सशस्त्र प्रहरीले पक्राउ गरेको छ । आर्थिक वर्ष ०८१/०८२ मा लागू औषधसहित ५५ जनालाई सशस्त्र प्रहरीले सिमा नाकाबाट पक्राउ गरि कारवाहीको लागि नेपाल प्रहरीको जिम्मा लगाएको हो ।

आर्थिक वर्ष ०८१/०८२ मा ५१ ग्राम २ सय ६५ मिलिग्राम लागू औषध ब्राउन सुगरसहित ५० जना, २८ केजी ९ सय ३० ग्राम चरेशसहित ४ र १ ग्राम ५ सय मिलिग्राम गाँजा सहित एक जनालाई नियन्त्रणमा लिई कारवाहीको लागि नेपाल प्रहरीलाई जिम्मा लगाएको सशस्त्र प्रहरी बल नेपाल नंम्बर ३१ गण सुरजपुरले जनाएको छ ।

त्यसैगरि आर्थिक वर्ष ०८१/०८२ मा बेचबिखन गर्ने उदेश्यले भारततर्फ लैजाँदै गरेको अवस्थामा ७ जना महिलालाई उद्दार गरि सो कार्यमा संलग्न रहेका ५ जना पुरुषलाई नियन्त्रण लिई आवश्यक कारवाहीको लागि नेपाल प्रहरीको जिम्मा लगाएको सशस्त्र प्रहरी उपरीक्षक मान बहादुर शाहीले बताए ।

एक वर्षमा २ करोड बढीको अबैध सामान सशस्त्र प्रहरीले बरामद गरि सम्बन्धित निकायमा बुझाएको छ । आर्थिक वर्ष ०८१/०८२ मा जिल्ला स्थित रहेको विभिन्न नाकाहरुबाट रु २ करोड बढीको अबैध सामान सशस्त्र प्रहरीले बरामद गरि कारवाहीको लागि सम्बन्धित निकायमा बुझाएको हो ।

जिल्ला स्थित करिब ८३ किलोमिटर भारतीय सिमासंग खुल्ला सिमाना छ । आर्थिक वर्ष ०८१/०८२ मा जिल्लाको विभिन्न नाकाबाट मुल्य रु २ करोड १२ लाख ६ हजार ६ बराबरको अबैध सामान बरामद गरि कारवाहीको लागि सम्बन्धित निकायमा बुझाएको सशस्त्र प्रहरी बल नेपाल नंम्बर ३१ गण हेड क्वाटर सुरजपुरले जनाएको छ ।