अफजल खान

बर्दिया – गुलरिया नगरपालिका वडा नम्बर ८ स्थित महाकवि स्कूल पछाडिको क्षेत्रदेखि सूरजपुरसम्म पछिल्लो समय बाघको आतङ्क बढ्दै गएको छ।

आज राति स्थानीय हनिफ अंसारीको दुईवटा खसी बाघले मारेको पुष्टि भएको छ। यस्तै, पछिल्ला दिनमा गाउँमा गाई, खसी, बाख्रालाई निशाना बनाउँदै आएको बाघले स्थानीयवासीमा भयको वातावरण सिर्जना गरेको छ।

स्थानीयवासीहरू भन्छन्, “पशु चौपायामात्र होइन, अब त बालबालिकामाथि आक्रमणको खतरा बढेको छ। सम्बन्धित निकायले बेलैमा नियन्त्रण नगरे खतरनाक अवस्था आउन सक्छ।”

उनीहरूले बाघ नियन्त्रणका लागि निकायहरूलाई तत्काल कदम चाल्न आग्रह गरेका छन्। “जब मान्छे मर्छ तब मात्र सरकारले कदम चाल्छ भन्ने प्रवृत्ति अन्त्य गर्नुपर्छ,” एक स्थानीय बासिन्दाले आक्रोश पोखे।

स्थानीयको माग छ कि बाघको गतिविधि तत्काल अनुगमन गरियोस् र आवश्यक परे पासो हालेर नियन्त्रणमा लिइयोस्।

यस सम्बन्धमा डिभिजन वन कार्यालय र राष्ट्रिय निकुञ्जसँग समन्वय गरी स्थलगत अनुगमन गर्नुपर्ने स्थानीयको माग छ।