बर्दिया, भदौ ३ / लागू औषधसहित प्रहरीले चार जनालाई पक्राउ गरेको छ । आइतबार दुई र सोमबार दुई जनालाई प्रहरीले लागू औषधसहित पक्राउ गरेको हो ।

गुलरिया नगरपालिका–६ का ३२ वर्षीय अजमेर अलि नाउँ र गुलरिया नगरपालिका–७ का ४० वर्षीय नुर महम्मद नाउँलाई प्रहरीले लागू औषधसहित सोमबार पक्राउ गरेको छ ।

गुलरिया नगरपालिका–७ स्थित बाईपास रोड स्थितबाट अजमेर अलि र वडा नंम्बर ६ स्थितबाट नुर महम्मदलाई नियन्त्रणमा लिई चेकजाँच गर्दा लागू औषध फेला परेको जनाईएको छ । अजमेरको साथबाट १ सय ८० मिलिग्राम र नुर महम्मदको साथबाट २ सय ७० मिलिग्राम लागू औषध ब्राउन सुगर जस्तो देखिने धुलो पदार्थ फेला परेको प्रहरीले जनाएको छ ।

यस्तै गुलरिया नगरपालिका–११ गणेशपुर स्थितबाट ठाकुरबाबा नगरपालिका–४ का २१ वर्षीय अबिशेष चौधरी र वडा नंम्बर १ का २१ वर्षीय विशाल खत्रीलाई प्रहरीले आइतबार पक्राउ गरेको छ ।

उनीहरुको साथबाट ४ सय ७० मिलीग्राम लागू औषध ब्राउन सुगर जस्तो देखिने गिलो पदार्थ फेला परेको प्रहरीले जनाएको छ । चारै जनालाई नियन्त्रणमा लिई सोमबार अदालतबाट ५ दिनको म्याद लिई थप अनुसन्धान भईरहेको डीएसपी चक्र बहादुर डमरपालले जानकारी दिए ।