अफजल खान

गुलरिया, जेठ ६ — बर्दियामा लागूऔषध सेवन गरेर सवारी चलाइरहेका चार जना चालकलाई प्रहरीले नियन्त्रणमा लिएको छ । ट्राफिक चेकजाँचका क्रममा चालकहरूलाई नियन्त्रणमा लिइएको हो ।

प्रहरीका अनुसार गुलरिया नगरपालिका–११ गणेशपुर चोकस्थित हुलाकी सडक खण्डमा बुधबार दिउँसो ३ बजेदेखि साँझ ६ बजेसम्म सवारी साधन चेकजाँच गरिएको थियो । चेकजाँचका क्रममा लागू पदार्थ सेवन गरेको अवस्थामा फेला परेका चालकहरूलाई आवश्यक कारबाहीका लागि नियन्त्रणमा लिइएको प्रहरीले जनाएको छ ।
लुम्बिनी प्रदेश प्रहरी अस्पताल नेपालगञ्ज, जिल्ला प्रहरी कार्यालय बर्दिया, जिल्ला ट्राफिक प्रहरी कार्यालय बर्दिया तथा प्रहरी चौकी महम्मदपुरबाट खटिएको संयुक्त टोलीले चेकजाँच अभियान सञ्चालन गरेको थियो ।
प्रहरीले नियन्त्रणमा लिइएकामध्ये दुई जना ईभी भ्यान चालक, एक विङ्गर भ्यान चालक र एक फोर्स भ्यान चालक रहेका छन् । उनीहरूविरुद्ध आवश्यक अनुसन्धान भइरहेको जिल्ला प्रहरी कार्यालय बर्दियाले जनाएको छ ।