बर्दिया,असार

धान रोपाई गरेर गुलरियामा धान दिवस तथा रोपाई महोत्सव मनाईएको छ । ‘जलवायु मैत्री प्रविधि, धानमा आत्म निर्भरता र समृद्धि’भन्ने मुल नारासहित सोमबार २३औं राष्ट्रिय धान दिवस तथा रोपाई महोत्सव मनाईएको हो ।
एकीकृत कृषि तथा पशुपंक्षी विकास कार्यालयको आर्थिक सहयोग, कृषि अनुसन्धान निर्देशनालय खजुरा बाँकेको सहकार्यमा र सुनौला महिला विकास बहुउद्देश्यीय सहकारी संस्था लिमिटेडको आयोजनामा गुलरिया नगरपालिका–३ खैरी स्थित धान दिवस तथा रोपाई महोत्सवमा मनाईएको छ ।
धान दिवसमा सहभागीहरुले तयार गरिएको खेतमा धान रोपाई गरेका थिए । धान दिवसमा सहभागी प्रमुख जिल्ला अधिकारी गोगन बहादुर हमाल, जिल्ला समन्वय समितिका प्रमुख सुर्य बहादुर बिष्ट, एकीकृत कृषि तथा पशुपंक्षी विकास कार्यालयकी प्रमुख कमला अधिकारीलगायतले धान रोपेका थिए ।
एकीकृत कृषि तथा पशुपंक्षी विकास कार्यालयको अनुसार जिल्लामा ५० हजार १ सय ५० हेक्टरमा बर्र्खे धान खेती हुन्छ । जसमा असार १५ गतेसम्म १८ प्रतिशत मात्र रोपाई भएको छ ।